عصفورتي - عبدالله السالم

عصفورتي يا فديت يدينك الناحلة
اللي ليا طوقتني (ذل مني جناح)

أرجوك تتفهمين اعذاري العاجلة
بس اضحكي لي عشان آحس بالارتياح

" با ودعك يا الضنى " وارجع لك القابلة
وان كان طالت عليك القابلة فالسماح

لا تخاصميني دخيل البسمة الذابلة
مثل اسود الغيم لا غطى جبين الصباح

***

هذي المدينة ضياع أو وحشة قاتلة
مافيه شي هنا يدعوك للانشراح

تطغى الشوارع باهلها والبيوت آهلة
لكني اقرا اغترابي في الوجيه الشحاح

عصفورتي لك مدارٍ عادني داخله
حبيس وجهك وانا شكلي طليق السراح

اشيل وجهك معي وافقده واشتاق له
واشم ريحتك حتى في المطر والرياح

***

أمس اشتكوا منك قالوا منتي بعاقلة
وانك تعيثين فيهم بالشغب والصياح

قلت اتركوها رجاءً عادها جاهلة
بكرة بتكبر ويلحقها العتب والجراح

تكفون عصفورتي لا تطولها طايلة
حتى ولوّ ايش سوت ! ما عليها جُناح

خلوني آحس في هاللحظة القاتلة
ان اسود الغيم ما غطى جبين الصباح