ماسمح قلبي - محمد عبدالوهاب الفيحاني
ماسمح قلبي يمروح زلا يرى
زول محبوبه ولو من بعيد
آه واويلاه ياليته درى
كيف حبه في حشا روحي يزيد
أو درى اني منه قد حالي برى
ذايب بالي عقب ماهو حديد
وأن من الابعاد موحي المقبرى
يحفرونه لي وموقن بالوعيد
يا لزيمي قول للي يحفرا
يوسع الملحد علشان اللحيد
ويحجز بيني ومابين الثرى
عن عظام ناحلات كالجريد
وأنت يادفان ياللي تقبرا
يامهيل الترب بالسرعه مجيد
حط من فوق القبر حتى يرى
بنيتين كالنصايب له شهيد
يعرفون القبر من جا ينظرا
يعرفونه قبر مذبوح الوديد
قبر من صان الموده واسترا
قبر من لاخان عهد للعهيد
من صبر للحب حتى بترا
زرع قلبه واودعه حب حصيد
تم عامين بجوفي ينسرا
نسر ملهوف الضواري في المصيد
كود ليمن جاه علمي يذكرا
وانعتوا قبري لمعلوقي وكيد
ياتي لقبري ويذكر ماجرى
يوم انا وياه في الدنيا عضيد
ويترحم بالدعا ليمن قرا
يوم خلاني وسط قبري وحيد
وان سمح بالدمع ودي ينثرا
فوق قبري عبرة مثل الوليد
اه منه لين صد ودبرا
رايح عني وخلاني فريد
كيف قلبه ساعته ثم اصيرا
كيف رجله له مشت فوق الصعيد
والذي هو غادي دونه ذرا
فدوة عن كل من جاله ضديد
كيف اجل لو مات وانا ارى
كان طريت السلب طر عنيد
واحترقت وكان قلبي قد ورى
شب نار كنها نار الوعيد
تحتطم وسط الضمير وتسعرا
مايبردها لو الثلج الجميد
ثم تلقاني على روس الذرى
نايح مع كل قمري يشيد
لين غرد طال نوحي واطهرا
وان هجع جريت انا نوحي سهيد
وانهمل وانهل دمعي وامطرا
مقلتين العين وادعاها هميد
ماهقا اني عقب موته في الورى
عايش الا وانا مثله فقيد