نايف - موسى الخليفي
نايف ترى حزني سما والصبر ماظنه جميل
إسمع شقول بقصتي ترى المعاني جارحه
عطني عيونك ينتهي بردي وذا الليل الطويل
وأعطيك روحي والعمر وإقرا علي الفاتحه
راحت حياتي كلها مابين غربه أو رحيل
كيف أغترب في موطني هذي الهزيمه فادحه
كم قالوا إن الموت حق لكن أنا مثل النخيل
أموت واقف كالنخل وسيول جنبي طافحه
مخدوع من قال الفرح طعمه كطعم السلسبيل
الحزن يجري بالعروق مثل الخيول الجامحه
إستسلمت كل الدروب في كفي الغض الهزيل
وإنتحرت دموعي حزن ليله لقانا البارحه
خذ مهجتي لجلك دفا وإشرب حناني زنجبيل
ثلج المسافه نبعده وأشوف بسمه واضحه
يمكن تعيش الحب جنه أو ليالي من عويل
لكن تحذر تخضع براسك لعذرا نايحه
زلزل طموحك لا تكون القاتل أو حتى القتيل
هذي السعاده تعشقك مره ومره رايحه
نايف ترى دنياك صعبه مايعيش إبها الذليل
إهمس لوقتك بالحقيقه وإن رفضها صارحه
لا تكتئب لا تنجرح واجه صحاري المستحيل
الحزن لوما صافحك لازم عليك إتصافحه
الوقت لو صدك تأكد إنك إنت إنت الأصيل
يبقى شموخك مرتفع مثل الطيور الجارحه
كون الجبل كون بحياتك كلها عابر سبيل
وإن ظامك الدهر بكفوفه وبجروحه سامحه
هذا الزمن دايم كذا إن مال ولا له نميل
الريح لوما ننحني تجعل جثثنا طايحه