حجارة - موسى الخليفي
قمر وتقول يكفي وصف يكفي غيّر الفكره
تعبنا من كلام الحب وإلأشواق وشجونك
نبي تتغزل بصخره صنع منها الطفل ثوره
نبيك تحس بالموقف نبي الأعداء يهابونك
تعلم كيف طفل القدس عاش بعالم الطفره
تغزل في حجر هالأرض عزف الحانه بكونك
صحيح إنه طفل لكن تعدى حاجز الشهره
عزف بالكف ثوره شعب تحدى أروع فنونك
ياشاعرنا قدرت تدخل العالم بثقب إبره
أنا اتحداك لو تقدر تشوف الثقب بعيونك
ألا ياشاعري بالله وين السيف والمهره
أبي اجتاح لك دنياك وأفجر بعض مكنونك
لانك يا رجل ترجف ولا تقدر تعول اسره
نبي تقعد في بيتك يا رجل والكل يخدمونك
ألا كيف الشجاع يخاف إذا خط القلم حبره
وكيف الكلمه تتجمد وكيف الذاكره تخونك
وكيف وكيف يتقزم وطن محسود من كبره
وكيف إسمك وطن عربي وكيف اليوم يهينونك
وكيف وكيف يتخلى الثمر في يوم عن قشره
وكيف إنته يا نمل الأرض اسود الغاب يخافونك
وكيف يعيش صلاح الدين يبكي ويشتكي بقبره
ولو تتكلم بكلمه لقيت الكل يسكتونك
أنا اتكلم وبتكلم وأشوف الناس منبهره
ينادوني يسكتوني على هونك على هونك
وأنا أرفض طلاسم ما تفسر حتى بالشفره
شجب تنديد وإستنكار بتصريحات يغشونك
أبد لا تصدق إن قالوا نحبك دوم ما نكره
نفاق وكذب واستهزاء يبيعونك ويشرونك
وشاشات العرب تعرض برامج حب في السهره
تعال وشوف وتفرج وإنسى اللي يسبونك
إذا كان المواطن يستحق الطعن في ظهره
أجل كيف ايتساوى هالوطن بالروح بعيونك
صنع أجدادنا الأمجاد والتاريخ والعبره
وجلسنا نبتسم ونقول يا رابين وشلونك
أسف ضاعت كرامه شعب وضاع القدس والصخره
وشعبك يا وطن نايم وهم كل يوم يقسمونك
تصبر يا فلسطيني ولا بد الفرج بكره
ولا بد إنهم في يوم على راسك يبوسونك