سرايفو - موسى الخليفي
نعم عار اللي حنا فيه نعم أصبحنا أكبر عار
على مستقبل الإسلام على تاريخنا المغمور
ألا يا مسلمين الأرض هبو جاكم إستعمار
سرايفو تناديكم تعالوا واشعلوها نور
صفعنا الصرب بكفوفه وحنا شجب وإستنكار
ولا يتأثر احساس العرب بالقتل أو بالجور
أسف ياغيره الإسلام اسف يا عزه الأحرار
كفانا يا عرب ذله نبي فارس يخوض بحور
عذرنا دوم ما نقدر شبعنا نبلع الأعذار
وحتى الطفل في ارض العرب يولد وهو مقهور
تبلد حسنا من كثر ما شفنا من الأخطار
تخدر جسمنا نحتاج لعلاجه بيد دكتور
نعم حنا البلا فينا مائه مليون يا ستار
حثاله صرب تتلاعب بنا يا عقلنا المخمور
توجهنا بقضايانا إلى مجلس وبه كفار
يا مجلس أمن أنقذنا وحس بصوتنا المهدور
أبد ما حد يسمعنا أبد ما نلفت الأنظار
لان الدنيا ما تسمع لصوت الخايف المذعور
ياشعب البوسنه والهرسك تعازينا على ما صار
ترانا من طبعنا الخوف والخايف أظن معذور
كرامتنا دفناها وكتبنا فيكم الأشعار
وهذا إللي فلحنا فيه واصبح ديننا مهجور