ان بكيت - رشيد نخلة

ان بكيت الكون من أجلك بكي
وان ضحكت انهز عرش المملكي

وكل شي ربي خلق لطف وجمال
أعطى البشر قيراط والبقوي لك

وكل شي ربي خلق لطف وجمال
قيراط خاس وعوضو هيبي وكمال

والقوى وغنج المعاطف والدلال
والشقاحة كلها خلقت بك

والشقاحة كلها خلق وخلق
عا رسم كسمك خالقك ما عاد خلق

عيون زرق، شفاف رق من الورق
وسنان لولو وشعر دبس بعلبكي

وسنان لولو وشعر ساجد علقدام
يشفع بقلب المبتلي ويقول حرام

وما بينعرفش الثغر لولا الابتسام
فستق مشقق ريحتو كالمستكي

فستق مشقق ريحتو ند وزبد
وما بينطبق حرف الا بالزبد

ولسان أحمر مخملي عليه انعقد
شهد اللمى حتى يصير حلو الحكي

شهد اللمى حتى يصير حلو الكلام
والعنق الله يسلمو عنق الحمام

وكتفين جسام وزنود لولا من الكمام
ذابوا كما يذوب الذهب بالمسبكي

ذابوا كما يذوب لولا الكمام
ولولا الانامل بالكفوف متل القلام

والصدر مرجة قطن والنهدين تمام
رمانتين واللون أبيض ليلكي

رمانتين ببزاز كالعنابتين
الطفل منها بيغتذي من مصتين

والخصر لاطي تحت هاك الفيتين
ناحل ملوى من التحافي بيشتكي

ناحل ملوى بيتقصفو لفحة هوا
وكيف ما الردف التوى تشوفو التوى

ووصف البقيي صعب يا أهل الهوى
ومعنى الكلام بيدركو العقلو ذكي

ومعنى الكلام يا مهجتي وفحوى الخبر
انت وأنا بجو الغرام شمس وقمر

ما منلتقى يا لهفتي غير بالنظر
ويا ريت الا عا طريق السالكي

ويا ريت الا عا طريق سالك صريح
تعبان بحالي وما بقيت رح بستريح

وحق السما ووحياة جروحات المسيح
ما بذكرك الا بيطلعلي البكي