المدّ العربي - محمد أسامة البهائي

قولوا( ليارا) ساعة الغارة
لما عنيها تشوف طيارة
بترمى قنابل فوق بيروت
مش هاتفرق بين الشعب
ولاهايفرق بيننا الموت
الدم النازف من أهالينا
هايحي الأرض إن مهما تموت
صوت كنايسنا برنة حزينة
وأدان جوامعنا ليوم الدين
لبنان أنتِ واحنا وهما
لبنان شعب عظيم الأمة
****
يوم اتناشر دق الموت
دق ودك الغول بيروت
هد منازل هد بيوت
حرم النسمة تعدى تفوت
ناس ف ثواني خطفها الموت
يعنى قدرها ف غارة تموت
ويجى خبرها في ديل النشرة
ليه الأمة تتوه فى العسـرة
وبايته الناس مكتوفه ف حسرة
و(يارا) بتجرى يمين وشمال
من بربير لحد بعلبــك
شافت لون الدم السايل
سايح سايح على فستانها
مين هايسبل عين التانى
مين حيحوش الموت عن يارا
دهشة بدهشة بقينا حيارا
وين بيروت اللي بنعشقها
فين بيروتنا اللى بنهواها
لبنان القلب مش لبيوت
(السنيورة) قال نبنيها
وقال (نصرالله) بعلو الصوت
التوحيد ياولاد الأمة
التوحيد ياولاد (.........).
قولوا (ليارا) ساعة الغارة
لما عنيها تشوف طيارة
بترمى قنابل فوق بيروت
مش هاتفرق بين الشعب
ولاهايفرق بيننا الموت
الدم النازف من أهالينا
هايحي الأرض إن مهما تموت
صوت كنايسنا رنينه حزين
وأدان جوامعنا ليوم الدين
لبنان أنتِ واحنا وهما
لبنان شعب عظيم الأمة
****
قولوا (ليارا) قبل الموت
لما ضفايرك تكبر حبه
افتكرى حبيبتى صوت الدانه
الأوطان مش بس محبه
الأوطان ياحبيـبتى أمانة
لون الدم المروى محبه
سال على دمى لأخر سجدة
وتاه المدد العربى النجدة
يا سكك الشمل
الأيد مش واحدة
قولوا ليارا قبل الموت
لما ضفايرك تكبر حبه
افتكرى حبيبتى صوت الدانه
وهوا بيحضن ورد خيالك
عايز يقتل حلم برئ
جسد الأمة ف دمه غريق
لو نتكاتف نلقى طريق
عمر عدوي مايبقي طليق
والمدد العربي حاطتنا ف ضيق
قولوا ليارا
وكل شعوب الوطن العربي
مهما هاتبلى الغمة الأمة
نبت المخلص مش هيموت
مهما يعدى عليه الوقت
مهما تشوف الأرض جفاف
عمر المؤمن مابيخاف
*****
قولوا ليارا
قبل ماعينها ف غفلة تنام
قبل ماترمح ف الأحلام
المدد العربى يا يارا كلام
المدد العربى ماجابش سلام
المدد العربى قالولنا تمام
لأنه عاوزنا يايارا ننام
وايه يمنعنا حبيبتى ننام
دا سلام الأمة لما تنام
وننام ، وننام ، وننام ، وننام
لحد مانصحى من الأوهام