سيوف ورماح - سلطان الهاجري
يا مجهز الفكسار بسيوف ورماح
ومفرقات الجمع حين التحامه
من ثقل مافوقه مطبه تمرجاح
مجهزه راعيه والدرب أمامه
يهوي كما حرٍ دعي له بملواح
فوقه عطاوي خواله عمامه
من وادي الشبرم الى مفرق رماح
يحدّد السرعه ويربط حزامه
وساعة تعدى سعد يالاح يوماح
عوّذ من الشيطان وارخى خطامه
ولحظة وصوله والشفق مابعد باح
رحبت به قدام يبدي سلامه
على أشقر الفنجال والعود فوّاح
وفقار شتوي سنامه يدامه
واخذت منه روس الأقلام بألحاح
وازرا المفسّر لا يفسّر حلامه
ورحت أتصفّح كل بيت تصفاح
وافك حرف وحرف أزوّد لحامه
يا ( ناصر الروقي ) ترى الزند قداح
والسلم الأول عزه الله وادامه
ماكل راعي ذود للذود مصلاح
بعض الرعاه مرافقته الغشامه
اللهم انه بس ضاوي وسرّاح
عنده مساس الأرض كنّه وخامه
الموت لا طيح من الذود طياح
واقفى عليها الليل يابو دلامه
وجاتك بعد مدّه معاشير ولقاح
وولادهن عيد الضحّيه تمامه
والغيث لاتكره مطيحه اليا طاح
ربع بصفاره وعطني خزامه
وان مرتك هجن المهابيل طفاح
اهبال طيب ولا صحاوة رخامه
هذا شطر بيت كما النجم وضاح
وعز الله ان راعيه على كلامه
اللي مسح روس التماسيح تمساح
واليا انتقم كلٍ يعرف انتقامه
والأوله والثانيه سم اذحاح
يبحر بها الصايم وتجرح صيامه
راحت سوالف كحيح ونتحناح
كلٍ شكت سبّابته من ابهامه
واليا حصد زرع الفلاليح فلاّح
العز يبقى من يجوّد زمامه
ولا يربح المليون يا جورج قرداح
يكود من راسه قويّه عظامه
ما يسترد الحق بصياح وانياح
وبشتٍ حساوي وساعٍ كمامه
الا بيوم فيه للجمع ضحضاح
يشيب منه اللي بحزّة فطامه
واسلم ودم ماناض برقا ومالاح
واقبل تحية صاحبك واحترامه