عنفوان البلبله - سلطان الهاجري
في عنفوان البلبله والأقاويل
وزخمٍ من الإعلام في زعيتمانه
هذي قناه الشجب والحط والشيل
وهذي قناة الملعنه والخيانه
وهذي قناة الرقص ( ياعين ياليل )
وعبدالله ابالخير والبردقانه
والقدس تقصفها مدافع إسرائيل
والغرب يعزف عزف كيد ولعانه
والشي والله في الليال المقابيل
أصبر علي شوي وأقول عانه
عان الليال الحيل لقحن وهن حيل
ولقاحهن غزو الأصل والديانه
غزوٍ يسمى ديمقراطي وتبديل
وطمس العوايد والشيم والأمانه
وش قلت ياسداح في كذبة إبريل
هي في صميم الذات والاّ وزانه
والهيل ياسداح عطر الفناجيل
والجِد ملح العجرفه والميانه
والخيل وين سروجها ياهل الخيل
راحت فرس عنتر تسابق حصانه
والمعركه بين النساء والرياجيل
مدري يفوز فلان والاّ فلانه
وأن قام حظ أم الرموش المظاليل
وقامت تثنّى كنّها الخيزرانه
ماعاد ياسداح حيله ولا حيل
أطلق شنب قلّه يجوّد مكانه
والقبّه اللي للنشاما مداهيل
ميدان سيف الله .. وعنتر زمانه
الله ثعا فيهم .. على مثل ماقيل
بعنصر نسائيٍ قويٍ كيانه
خطوات عوباً صوتها يصهل صهيل
تشرشح النايب .. وتكرب بطانه