دموع وضياع وامكنه - أبعاد التركي

حلم مقفي بي عن الناس وارخيت رسنه
مانشدته ليه يطوي مساحات البعيد

وسط صمان المعاليق ألمح موطنه
لو يبيد الحلم تبقى دروبه ما تبيد

والفياض اللي روت من عيوني بينه
ما تشابها فياض روت من سر مديد

كان يسكني وانشد عنه من عينه
كنت أخاف من النميمه على شفة بليد

كم جمعني في كفوفه بلحظة شيطنه
وكم نثرحزني على الما وصفحات الجليد

كنت ألقى في عيونه فراشي واسكنه
واغزل النجمات عقد غفى له وسط جيد

ألمس بصدري دموع وضياع وأمكنه
طفل هارب من يدين تنامت ألف ايد

رحت أطعن في ضلوعه ولا أدري عنه
واكتشفت اني ذبحته وهو طفلي الوحيد

ليه أقتل عمر عايش بنبضي وادفنه
كيف أبدا والبدايه عمر جديد؟

والربيع اللي بصدري تعرى سوسنه
والجفاف يعانق الريح وأنفاس الجريد

ذنب لا شفت أعظمه قلت ما أصعب هينه
داخله في رحمة اللي ترجاه العبيد

يا كبر ذنبي ورحمة إلهي ممكنه
أتعب الكفار صدري أبي مسلم عنيد

ماتزحه من مكانه رماح مسننه
لو تسلط سيف عنتر على حبل الوريد